O II Concurso de Curtas da Prehistoria ponse en marcha para recibir os traballos antes do 11 de xullo

Toda a actualidade de Mos

O certame presentouse coa edil de Educación e Participación Cidadá, Julia Loureiro, representantes da Asociación Cultural Festa da Prehistoria e d

A concelleira de Participación Cidadá e Educación, Julia Loureiro, xunto con representantes das asociacións Cultural Festa da Prehistoria e Xuvenil Mos-Keo Colectivo, presentaron hoxe en rolda de prensa o II Concurso de Curtas da Prehistoria, do cal se acaba de abrir o prazo de presentación de traballos participantes. Este concurso surxiu como complemento da Festa da Prehistoria que se leva celebrando cada verán no Concello de Mos dende fai oito anos, e da que a vindeira edición terá lugar os días 7 e 8 de agosto.

A presentación desta mañá realizouse no salón de actos do IES de Mos para animar ós estudiantes a participares no certame. O prazo de presentación e inscrición de curtametraxes no mesmo rematará o venres día 3 do próximo mes de xullo.

Tanto Loureiro, en representación do Concello, coma Marcos Escudero, representando á Asociación Cultural Festa da Prehistoria, lembráronlles ós alumnos do instituto o “afortunados” que son ó contar no seu municipio cunha celebración histórica desta magnitude. Escudero apuntou que “nos meus anos mozos cando queriamos desfrutar dunha festa da historia tiñamos que desprazarnos ata Catoira ou Ribadavia e agora a tendes eiquí na casa, coma quen dí, así que anímovos a apoveitar ó máximo esta oportunidade”. Pola súa banda a edil de Educación e Participación Cidadá agradeceu ás dúas entidades organizadoras o seu esforzo para lograr facer realidade tanto o Concurso de Curtas da Prehistoria coma a Festa da Prehistoria e invitou ós rapaces presentes na rolda de prensa a participar en ambas iniciativas, “xa que é bo rememorar feitos históricos mediante a diversión e o festexo e non só a través de libros e clases maxistrais”, dixo.

Bases
A temática das curtametraxes que se presenten a concurso deberá ser a Prehistoria, podendo abordala dende diferentes perspectivas a través do documental, a ficción, a animación, o humor, entre outras. As curtas participantes non poderán exceder a duración máxima de 10 minutos e deberán entregarse en formato DVD, con caixa e carátula na que se especifique o título da obra e o autor, xunto cunha fotocopia do DNI do mesmo na concellería de Cultura do Concello de Mos. A entrega dos traballos pode facerse en man ou por correo no enderezo: Rúa Reguengo, s/n. 36415. Petelos. Mos.

O día 11 de xullo ás 19.00 horas proxectaranse no Pazo de Mos tódalas películas participantes no concurso e un xurado seleccionará as finalistas que serán exhibidas no parque da Penacova, en Mos, os días 7 e 8 de agosto durante a VIII Festa da Prehistoria. Durante estas datas o xurado decidirá cales son as tres gañadoras e, polo tanto, beneficiarias dos premios que consistirán: o primeiro en 300 euros, para a segunda clasificada serán 200 euros e a terceira finalista levará 100 euros. A entrega de ditos premios producirase o sábado 8 de Agosto, día grande da Festa da Prehistoria.

Os interesados en participar neste II Concurso de Curtas da Prehistoria poden solicitar máis información vía e-mail na dirección de correo electrónico: festadaprehistoria@gmail.com, ou ben no número de teléfono 647 00 59 10.

Fonte: VM
Artigo orixinal: http://www.vigometropolitano.com/news/163/ARTICLE/15071/2009-03-23.html